Bebe Rexha “godet” kritikët e saj me një përgjigje epike

Bebe Rexha është rikthyer në qendër të vëmendjes pas paraqitjes së saj në “American Music Awards 2026”, por jo vetëm për muzikën. Këngëtarja shqiptaro-amerikane u përball me një valë komentesh në rrjet për pamjen e saj fizike, pasi disa përdorues nisën krahasime mes fotove të vjetra dhe videove të saj nga eventi glamour i mbajtur më 25 maj.

Një postim që u bë viral në platformën X pyeste ndjekësit: “Cili është mendimi juaj i parë?”, duke nxitur reagime të shumta ndaj artistes. Por Bebe nuk zgjodhi të hynte në debate apo të justifikohej. Përkundrazi, ajo iu përgjigj situatës me ironi dhe shumë klas.

“Mendimi im i parë? Albumi im i ri ‘Dirty Blonde’ publikohet më 12 qershor dhe mund ta porosisni që tani”, shkroi këngëtarja, duke e kthyer gjithë vëmendjen te projekti i saj më i ri muzikor.

Nuk është hera e parë që Rexha përballet publikisht me komentet për trupin e saj. Artistja ka folur shpesh për presionin që përjetojnë figurat publike dhe për faktin se njerëzit nuk e dinë gjithmonë çfarë sfidash personale apo shëndetësore mund të kalojë dikush larg kamerave.

Bebe ka treguar më herët se vuan nga PCOS, një çrregullim hormonal që ndikon edhe në shtimin e peshës, ndërsa ka kritikuar vazhdimisht mënyrën se si pamja fizike e grave bëhet objekt diskutimi në internet.

Këtë herë, në vend të polemikave, Rexha vendosi të flasë me muzikë. Dhe mesa duket, “Dirty Blonde” po vjen si përgjigjja më e fortë ndaj gjithë zhurmës online.