FIFA tërhiqet nga plani miliardësh

FIFA ka hequr dorë nga plani për të shitur një pjesë të aksioneve të Kupës së Botës te investitorët privatë, pas valës së reagimeve dhe kundërshtimeve që pasuan prezantimin e projektit.

Presidenti i FIFA-s, Gianni Infantino, konfirmoi se propozimi nuk do të ecë më përpara, duke theksuar se ruajtja e unitetit në futboll është prioritet. Sipas tij, konsultimet me palët e përfshira treguan se iniciativa kishte krijuar përçarje dhe nuk i shërbente më qëllimit për të cilin ishte menduar.

Plani synonte të siguronte rreth 4.2 miliardë dollarë përmes shitjes së rreth 20 për qind të aksioneve në një strukturë të re që do të administronte aktivitetet më të rëndësishme të FIFA-s, përfshirë edhe Kupën e Botës. Fondet e siguruara do të përdoreshin për zhvillimin e futbollit në nivel global.

Megjithatë, projekti hasi në kundërshtim të fortë, veçanërisht nga UEFA, e cila e cilësoi idenë si një rrezik për identitetin e futbollit dhe paralajmëroi edhe mundësinë e bojkotit të kompeticioneve nëse propozimi miratohej.

Infantino bëri të ditur se tashmë fokusi i FIFA-s do të jetë rikthimi i dialogut me të gjitha federatat dhe vazhdimi i investimeve për zhvillimin e futbollit, veçanërisht në vendet që kanë më shumë nevojë për mbështetje.