Halle Berry përballet me akuzat për dhunë ndaj djalit, vajza del në mbrojtje të saj

Një betejë e re ligjore po trazon jetën private të aktores Halle Berry. Ish-bashkëshorti i saj, Olivier Martinez, e ka akuzuar aktoren për dhunë fizike ndaj djalit të tyre, Maceo, duke kërkuar edhe kujdestarinë e plotë të tij. Sipas pretendimeve të Martinez, incidenti ka ndodhur më 26 shtator, gjatë një konflikti në shtëpinë e Berry-t, ndërsa djali po luante me një pajisje virtual reality.

Martinez pretendon se situata u përshkallëzua dhe se Berry e kapi djalin në qafë. Ai ka kërkuar një urdhër mbrojtjeje dhe ndryshimin e marrëveshjes së kujdestarisë. Gjykata ka vendosur përkohësisht kufizime mbi kontaktin e Berry-t me djalin, ndërsa çështja vazhdon të shqyrtohet.

Por Halle Berry i ka mohuar kategorikisht akuzat. Në dokumentet e dorëzuara në gjykatë, aktorja deklaron se nuk e ka abuzuar kurrë djalin e saj dhe se përplasja ishte një moment loje fizike mes tyre që më pas u tensionua. Berry thotë gjithashtu se ka prova, përfshirë video dhe mesazhe, që sipas saj kundërshtojnë versionin e ish-bashkëshortit.

Aktorja ka sjellë në vëmendje edhe historinë e saj personale, duke deklaruar se vetë ka qenë viktimë e dhunës në familje dhe se prej vitesh mbështet viktimat e saj. Berry këmbëngul se nuk është person i dhunshëm dhe se nuk do ta lëndonte kurrë djalin e saj.

Ndërkohë, një tjetër zhvillim i fundit ka ardhur nga vajza e saj 18-vjeçare, Nahla Aubry. Ajo ka dalë në mbrojtje të nënës së saj, duke deklaruar se nuk e ka parë kurrë Berry-n të sillet në mënyrë të dhunshme ndaj dikujt dhe duke e përshkruar si një nënë të dashur dhe të pranishme në jetën e fëmijëve të saj.

Në zhvillimin më të fundit, Berry ka përfunduar edhe programin edukues për prindërit “Our Children First”, një kërkesë e gjykatës në kuadër të procesit të kujdestarisë. Tashmë vëmendja zhvendoset te seanca e 16 tetorit, ku pritet të shqyrtohet më tej konflikti mes ish-bashkëshortëve.

Për momentin, akuzat mbeten pjesë e një beteje të hapur ligjore dhe nuk përbëjnë një konstatim gjyqësor se Berry ka kryer dhunë ndaj djalit të saj.