“Michael” thyen çdo rekord

Filmi biografik “Michael” ka hyrë në histori si produksioni më fitimprurës i Lionsgate, duke u bërë njëkohësisht filmi i parë i studios që kalon shifrën marramendëse prej 1 miliard dollarësh në arkëtimet globale.

Me këtë sukses, “Michael” ka lënë pas titujt ikonë të Lionsgate si The Hunger Games: Catching Fire dhe The Twilight Saga: Breaking Dawn – Part 2, të cilët për vite me radhë mbanin rekordet e studios.

I drejtuar nga regjisori Antoine Fuqua, filmi sjell në ekran rrugëtimin e jashtëzakonshëm të Michael Jackson, duke nisur nga ditët e tij me grupin Jackson 5 e deri te shndërrimi në legjendën e muzikës botërore, të njohur si “Mbreti i Popit”. Në rolin kryesor interpreton Jaafar Jackson, kushëriri i artistit, ndërsa Colman Domingo dhe Nia Long luajnë prindërit e tij, Joe dhe Katherine Jackson.

Presidenti i Lionsgate Motion Picture Group, Adam Fogelson, e cilësoi filmin një fenomen global, duke theksuar se publiku e përqafoi që në ditët e para të shfaqjes dhe se suksesi i tij dëshmon ndikimin e pandalshëm të Michael Jackson në kulturën pop, si edhe fuqinë që kinemaja vazhdon të ketë te shikuesit.

“Michael” është një nga vetëm pak filmat që kanë kaluar kufirin e 1 miliard dollarëve gjatë vitit 2026. Deri më tani, vetëm “Super Mario Galaxy Movie” ka regjistruar një rezultat më të lartë, ndërsa “Toy Story 5” po i afrohet me ritme të shpejta kësaj shifre.

Pas këtij triumfi në arkën filmike, raportimet sugjerojnë se Lionsgate po shqyrton seriozisht realizimin e të paktën edhe një filmi tjetër kushtuar jetës dhe trashëgimisë së Michael Jackson.