Natë historike për klubet shqiptare në Europë

Futbolli shqiptar ka përjetuar një tjetër mbrëmje të artë në arenën europiane. Egnatia, Dinamo City dhe Drita siguruan kualifikimin në fazën “play-off” të kompeticioneve të UEFA-s, ndërsa vetëm Shkëndija e Tetovës i dha fund rrugëtimit të saj kontinental.

Heroina e mbrëmjes ishte Egnatia, e cila realizoi një përmbysje spektakolare ndaj Shamrock Rovers. Pas humbjes 3-1 në ndeshjen e parë, kampionët e Shqipërisë triumfuan 5-1 në shtëpi, duke siguruar një kualifikim të jashtëzakonshëm, madje edhe me një lojtar më pak gjatë gjithë pjesës së dytë. Adjessa shkëlqeu me dy gola, Albanese realizoi një “hat-trick”, ndërsa Gruda vulosi një nga fitoret më të mëdha në historinë europiane të klubit.

Falë këtij suksesi, Egnatia do të përballet me Lillestrøm në “play-off” për një vend në Ligën e Europës. Deri më tani, klubi ka siguruar rreth 3.17 milionë euro nga pjesëmarrja në kupat europiane, ndërsa një kualifikim në fazën e ligës së Europa League do t’i garantonte edhe 4.31 milionë euro të tjera.

Festë pati edhe në Tiranë, ku Dinamo City përmbysi humbjen e ndeshjes së parë ndaj Audës me një fitore bindëse 4-0. Qardaku, Qefalia, Ayodeji dhe Fadairo ishin autorët e golave që i siguruan skuadrës kryeqytetase kalimin në “play-off”, ku tani e pret përballja me Pafos.

Edhe Drita vazhdon të shkruajë historinë. Kampionia e Kosovës mposhti me rezultatin e thellë 5-0 Tre Fiorin në Prishtinë, duke vulosur kualifikimin me rezultatin e përgjithshëm 9-1. Nguena dhe Manaj realizuan nga dy gola, ndërsa Arthur shtoi edhe një tjetër, me gjilanasit që tashmë do të sfidojnë Inter d’Escaldes për një vend në fazën e ligës së Conference League.

E vetmja notë zhgënjyese e mbrëmjes erdhi nga Shkëndija e Tetovës. Skuadra shqiptare barazoi 0-0 ndaj Hibernianit në Shkup, por humbja 2-1 në Skoci rezultoi fatale, duke i dhënë fund aventurës europiane të tetovarëve.

Pavarësisht eliminimit të Shkëndijës, mbrëmja konfirmoi një sukses të madh për futbollin shqiptar, me tre klube që vazhdojnë ëndrrën europiane dhe afrohen gjithnjë e më shumë me fazën e ligës në kompeticionet e UEFA-s.