Nga Big Brother në altar: Kushtrimi dhe Aurora kurorëzojnë dashurinë me një dasmë tradicionale

Historia e dashurisë që nisi brenda shtëpisë së Big Brother VIP Kosova tashmë ka marrë fundin më të bukur.

Kushtrim Kelani dhe Aurora Rrusta i kanë dhënë fund beqarisë dhe kanë kurorëzuar dashurinë e tyre në një dasmë të veçantë, duke nisur zyrtarisht një kapitull të ri së bashku.

Çifti u njoh gjatë edicionit të katërt të Big Brother VIP Kosova, ku mes tyre nisën edhe shkëndijat e para. Por ndryshe nga shumë histori që përfundojnë bashkë me reality-show-n, lidhja e Kushtrimit dhe Aurorës vazhdoi edhe pas daljes nga shtëpia.

Fillimisht ata e mbajtën raportin larg vëmendjes së madhe publike, ndërsa më vonë e konfirmuan hapur lidhjen e tyre.

Hapi i madh erdhi në shtator, kur Kushtrimi i propozoi Aurorës në një moment romantik, ndërsa vetëm një ditë më vonë ai shkoi së bashku me familjarët e tij për t’ia kërkuar dorën, duke respektuar traditën shqiptare.

Dhe tashmë erdhi dita e dasmës.

Festa nisi me marrjen e nuses, sipas traditës shqiptare, ndërsa më pas çifti kurorëzoi dashurinë e tyre dhe i tha “PO” njëri-tjetrit.

Aurora u shfaq me fustanin e bardhë të nusërisë, ndërsa Kushtrimi zgjodhi një pamje elegante për ditën e tij të madhe. Muzika, familjarët, miqtë dhe atmosfera tradicionale shoqëruan festën, e cila u zhvillua në Prishtinë.

Në mesin e të ftuarve ishin edhe disa figura të njohura nga Big Brother VIP Kosova, duke sjellë në dasmë edhe një pjesë të historisë që i bashkoi çiftin.

Nga një njohje brenda shtëpisë më të famshme televizive në Kosovë, te një dashuri e ndërtuar larg kamerave dhe tani deri në altar, Kushtrimi dhe Aurora duket se kanë dëshmuar se jo çdo histori që nis në një reality-show përfundon me fikjen e kamerave.

Për ta, kamera u fikën, por historia vazhdoi.