Mimoza Ahmeti ndez “Prime”, Jetmir Salaj plas bombën

Mbrëmja që duhej të sillte vetëm spektakël, u kthye në një nga debatet më të komentuara të ditëve të fundit në showbizin shqiptar. Një moment i transmetuar live në “Prime” ka ndezur jo vetëm studion, por edhe gjithë rrjetin, pasi në qendër të diskutimit u vendos raporti mes shkrimtares së njohur Mimoza Ahmeti dhe ish-konkurrentit Adioni.

Gjithçka nisi pas një klipi të prezantuar nga moderatorja Arbana Osmani, ku u hodhën dyshime se mes dyshes mund të kishte ekzistuar diçka më shumë sesa thjesht afërsi miqësore. Tema u mor menjëherë nga paneli, i cili nisi të analizonte çdo detaj të raportit të tyre, duke e kthyer në një nga pikat më të nxehta të mbrëmjes.

Por ndërsa në studio diskutimi mori jetë, jashtë saj situata mori një tjetër drejtim. Në rrjetet sociale shpërthyen reagime të forta, me shumë ndjekës që e konsideruan këtë narrativë të ekzagjeruar dhe të panevojshme.

Megjithatë, reagimi që bëri më shumë zhurmë erdhi nga Jetmir Salaj, i cili nuk kurseu aspak fjalët. Përmes disa postimeve në Instagram, ai goditi hapur mënyrën se si u trajtua figura e Mimozës në spektakël, duke e cilësuar debatin si një përpjekje për të ndërtuar histori aty ku, sipas tij, nuk ekziston asgjë.

Me tone të ashpra dhe pa filtra, Jetmiri e quajti panelin “një turmë që ndërton narrativa për të prodhuar sensacion”, ndërsa në një tjetër postim ngriti figurën e shkrimtares si simbol i lirisë dhe individualitetit.

Brenda pak minutash, postimet e tij nisën të shpërndaheshin masivisht, duke e kthyer këtë përballje në një debat të ri publik: ku mbaron analiza televizive dhe ku nis cenimi i figurës personale?