Italia i mbyll derën, Shqipëria i hap skenën Kanye West

Ndërsa Italia ka vendosur të anulojë dy nga koncertet më të përfolura të verës, Shqipëria po përgatitet të mirëpresë një prej emrave më kontroversë të muzikës botërore. Kanye West, i njohur si Ye, pritet të ngjitet në skenë në Tiranë më 11 korrik, vetëm pak ditë përpara datave kur duhej të performonte në Itali.

Autoritetet italiane kanë bllokuar koncertet e planifikuara në Reggio Emilia, ku Kanye West dhe Travis Scott do të performonin më 17 dhe 18 korrik. Vendimi u mor për arsye sigurie dhe rendi publik, ndërsa shqetësimet kryesore lidhen me polemikat e vazhdueshme që kanë shoqëruar reperin amerikan gjatë viteve të fundit.

Në të kundërt, në Shqipëri po ecin me ritme të shpejta përgatitjet për një nga eventet më të mëdha muzikore të organizuara ndonjëherë në vend. Në zonën e Kasharit ka nisur ndërtimi i “Eagle Stadium”, një arenë e përkohshme me kapacitet rreth 60 mijë spektatorë, ku pritet të zhvillohet koncerti i shumëpritur.

Ministri i Turizmit, Kulturës dhe Sportit, Blendi Gonxhja, ka ndarë pamje nga punimet, duke e cilësuar koncertin si një ngjarje me ndikim ndërkombëtar që do të tërheqë vëmendjen e mediave dhe fansave nga vende të ndryshme të botës.

Interesi për eventin duket i lartë edhe për shkak të çmimeve të biletave, të cilat variojnë nga 120 euro për zonat standarde deri në 339 euro për paketat VIP.

Vendimi i Italisë vjen në një moment kur disa vende europiane kanë treguar rezerva ndaj performancave të Kanye West. Gjatë muajve të fundit, artisti është përballur me anulime dhe kufizime në disa shtete, ndërsa debatet rreth figurës së tij vazhdojnë të jenë pjesë e titujve kryesorë të mediave ndërkombëtare.

Megjithatë, duket se Tirana do të jetë një nga ndalesat më të rëndësishme të turneut të tij këtë verë. Nëse gjithçka shkon sipas planit, Shqipëria mund të kthehet në qendrën e vëmendjes së skenës muzikore ndërkombëtare për një natë që pritet të mbledhë mijëra fansa nga rajoni dhe më gjerë.