Shuhet në moshën 37-vjeçare ylli i “Party Rock Anthem”
Written by radio wave on July 7, 2026
Bota e muzikës është tronditur nga lajmi për ndarjen nga jeta të këngëtares britanike Lauren Bennett, e cila u shua në moshën 37-vjeçare.
Artistja, e njohur për interpretimin e saj në superhitin “Party Rock Anthem” të LMFAO dhe si pjesë e grupit GRL, ndërroi jetë më 29 maj në Kent të Anglisë. Deri më tani, autoritetet nuk kanë bërë publik shkakun e vdekjes.
Lajmin e dhimbshëm e konfirmuan ish-anëtaret e GRL përmes një dedikimi emocional në rrjetet sociale, ku shprehën pikëllimin për humbjen e mikeshës së tyre.
“Zemrat tona janë të thyera. Lauren do të mbetet gjithmonë në kujtimet tona për buzëqeshjen, dashurinë dhe momentet e paharrueshme që ndamë së bashku. Do të na mungojë pafund”, thuhet në mesazhin e tyre.
Lauren Bennett u bë e njohur në mbarë botën në vitin 2011 falë suksesit të jashtëzakonshëm “Party Rock Anthem”. Më vonë ajo iu bashkua grupit GRL, me të cilin publikoi këngë të njohura si “Ugly Heart” dhe “Wild Wild Love”, në bashkëpunim me Pitbull.
Pas vetes, këngëtarja lë vajzën e saj gjashtëvjeçare, Harlow, nga lidhja me balerinin dhe aktorin Kenny Wormald.
Humbja e Bennett rikthen në vëmendje edhe tragjedinë që preku grupin GRL në vitin 2014, kur anëtarja Simone Battle ndërroi jetë, duke e bërë këtë një tjetër goditje të rëndë për historinë e grupit.
