Harry përplaset sërish me Pallatin

Marrëdhënia mes Princit Harry dhe familjes mbretërore britanike vazhdon të mbetet e tensionuar. Gjatë vizitës së tij të fundit në Londër, Duka i Sussex-it nuk do të akomodohet në Buckingham Palace, pavarësisht se kishte pranuar ftesën për të qëndruar në rezidencën mbretërore.

Harry ndodhet në Mbretërinë e Bashkuar për angazhime që lidhen me Invictus Games, si edhe për të marrë pjesë në procesin gjyqësor kundër botuesit të gazetave Daily Mail dhe Mail on Sunday.

Sipas përfaqësuesve të tij, ai kishte konfirmuar pranimin e ftesës, por më pas u informua se nuk ishte më e mundur të organizohej akomodimi në Pallat, pasi afatet kishin kaluar.

Burime pranë familjes mbretërore japin një version tjetër të ngjarjes, duke theksuar se Harry nuk iu përgjigj brenda kohës së parashikuar, çka e bëri të pamundur për stafin e Buckingham Palace të përgatiste qëndrimin e tij.

Situata është komplikuar edhe më shumë nga çështja e sigurisë. Që prej largimit nga detyrat mbretërore, Harry nuk përfiton më mbrojtje zyrtare të financuar nga shteti, ndaj këtë udhëtim e ka zhvilluar i vetëm, pa bashkëshorten Meghan Markle dhe dy fëmijët e tyre.

Ndërkohë, mbetet ende e paqartë nëse Meghan dhe fëmijët do t’i bashkohen Harry-t në ditët në vijim. Vizita e tyre do të ishte e para në Britani që nga viti 2022, një detaj që ka ngjallur interes të madh në mediat britanike.