Rrëfimi prekës i Granit Xhakës për jetën personale, sjell anën tjetër të ikonës

Granit Xhaka ka hapur zemrën në një intervistë të fundit, duke folur jo vetëm për karrierën e tij si futbollist, por edhe për rolin më të rëndësishëm në jetën e tij – atë të babait.

Kapiteni i Zvicrës, i cili është baba i tre vajzave, Ayana, Laneya dhe Neyana, të lindura nga martesa me Leonita Lekajn, thotë se familja është forca që e mban gjithmonë me këmbë në tokë, pavarësisht suksesit dhe presionit që sjell futbolli profesionist.

Xhaka zbulon se edhe sot vazhdon të kërkojë këshilla nga prindërit dhe vëllai i tij, Taulant Xhaka. Sipas tij, vitet e kanë bërë më të duruar dhe i kanë mësuar se jo gjithçka arrihet menjëherë, ndryshe nga mënyra se si e shihte jetën në rininë e tij.

Jashtë fushës së blertë, futbollisti tregon se është një njeri i përkushtuar ndaj familjes. Një nga kujtimet më të veçanta në shtëpinë e tij është një pikturë ku paraqiten bashkëshortja dhe vajza e tyre e parë, një dhuratë që ka një vlerë të veçantë emocionale për të.

Duke folur për edukimin e vajzave, Xhaka shprehet se dëshiron t’u transmetojë ambicien, këmbënguljen dhe vullnetin për të mos u dorëzuar kurrë përballë sfidave. Në të njëjtën kohë, ai pranon se nuk do të donte t’u trashëgonte padurimin, një tipar që e ka shoqëruar për vite me radhë.

Historia e Granit Xhakës është ajo e një njeriu që ka luftuar për çdo arritje, që nga largimi i familjes së tij nga Kosova drejt Zvicrës e deri te ngritja në elitën e futbollit botëror. Për të, suksesi nuk matet vetëm me trofetë, por edhe me familjen, e cila mbetet motivimi më i madh në çdo hap të jetës.