“Kloni” i Haaland po çmend rrjetin, por nuk është ajo që mendoni…

Jo vetëm Erling Braut Haaland ishte në qendër të vëmendjes gjatë Kupës së Botës 2026. Paralelisht me paraqitjet e shkëlqyera të sulmuesit norvegjez, një modele ruse është kthyer në fenomen në rrjetet sociale për shkak të ngjashmërisë së habitshme me yllin e futbollit.

Bëhet fjalë për Anastasia Kostromitina, 24-vjeçaren që brenda pak javësh ka fituar një popullaritet të jashtëzakonshëm falë videove ku imiton pamjen, mimikat dhe reagimet karakteristike të Haaland. Postimet e saj janë bërë virale, duke i sjellë mbi 150 mijë ndjekës në Instagram dhe më shumë se 100 milionë shikime në platformat sociale.

Në një intervistë për TalkSport, Anastasia tregoi se ngjashmërinë me futbollistin e kishte kuptuar vite më parë, pasi miqtë e saj ia kishin vënë në dukje vazhdimisht. Sipas saj, gjatë Botërorit 2026 pa se në internet po krijohej një trend me persona që i ngjanin Haaland dhe vendosi t’i bashkohej edhe ajo.

“E mendova si diçka argëtuese dhe nuk e prisja që videot të shpërthenin në këtë mënyrë. Papritur gjithçka u bë virale”, u shpreh modelja.

Edhe në një prononcim për Reuters, ajo tha se nuk ndihet aspak në siklet nga krahasimet me sulmuesin norvegjez. Përkundrazi, Anastasia e sheh të gjithë situatën si një mënyrë për të argëtuar publikun.

“Nëse njerëzit qeshin me videot e mia, aq më mirë. Nuk kam arsye të turpërohem dhe ndihem mirë me veten”, deklaroi ajo.

Anastasia Kostromitina është pjesë e një agjencie mode në Rusi dhe prej kohësh ndërton edhe karrierën si influencuese. Në rrjetet sociale ajo ndan momente nga udhëtimet, rutina e kujdesit personal, moda dhe jeta e përditshme, por pikërisht ngjashmëria e pazakontë me Erling Haaland e ka kthyer në një nga personazhet më të komentuar të këtij Botërori.