Arrestohet reperi Mossi në Prishtinë, dyshohet se u kap me armë

Rep-artisti nga Kosova, Gramos Krasniqi, i njohur në skenën muzikore me emrin Mossi, është arrestuar sot në Prishtinë.

Sipas raportimeve, arrestimi lidhet me dyshimin se reperi është kapur me armë. Rasti vjen vetëm pak ditë pasi Mossi dyshohet se kishte publikuar një video në rrjetet sociale, përmes së cilës kishte kërcënuar Policinë e Kosovës.

Deri tani, nuk janë bërë të ditura detaje të plota mbi operacionin e arrestimit. Gjithashtu, mbetet e paqartë se çfarë lloj arme është sekuestruar dhe për cilën vepër penale po hetohet konkretisht reperi.

Ndërkohë, nuk ka ende një reagim publik nga Gramos Krasniqi apo përfaqësuesit e tij në lidhje me akuzat dhe rrethanat e arrestimit.

Hetimet pritet të zbardhin më tej rrethanat e rastit dhe nëse pretendimet e ngritura ndaj artistit do të çojnë në procedim penal.