Kaos në koncertin e Jay-Z

Mbrëmja finale e koncerteve të Jay-Z në Yankee Stadium u shndërrua në një natë të tensionuar, pasi qindra persona pa bileta tentuan të futeshin në stadium, duke detyruar organizatorët të mbyllnin përkohësisht hyrjet.

Kaosi krijoi turma të mëdha jashtë stadiumit dhe shtyu nisjen e koncertit me afro katër orë. Sipas organizatorëve, disa persona arritën të kalonin barrierat e sigurisë, duke bërë që policia e New Yorkut të ndërhynte për të rikthyer situatën nën kontroll.

Fansat që kishin bileta u përballën me pritje të gjata dhe momente tensioni. Disa prej tyre raportuan se persona të ndryshëm patën probleme shëndetësore dhe kërkuan ndihmë mjekësore gjatë rrëmujës.

Pamjet e publikuara në rrjetet sociale treguan turma të mëdha njerëzish jashtë Yankee Stadium edhe shumë kohë pas orarit të planifikuar të nisjes.

Jay-Z më në fund u ngjit në skenë rreth orës 00:15 dhe u kërkoi falje fansave për vonesën. Reperi shpjegoi se koncerti ishte shtyrë për të shmangur përshkallëzimin e situatës dhe për të garantuar sigurinë e publikut.

Koncerti ishte pjesë e një serie speciale tre-ditore, përmes së cilës Jay-Z festoi përvjetorët e dy albumeve të tij më të njohura, “Reasonable Doubt” dhe “The Blueprint”.

Pavarësisht kaosit në hyrje, nata finale regjistroi një rekord të ri pjesëmarrjeje në stadium, me 45.832 spektatorë të pranishëm.