LeBron ndryshon historinë, firmos me 76-ers

Një nga lëvizjet më të bujshme në historinë e NBA-së është bërë realitet. LeBron James ka nisur një kapitull të ri në karrierën e tij legjendare, duke u bashkuar me Philadelphia 76ers me objektivin për të kërkuar një tjetër titull kampion.

Transferimi është konfirmuar nga klubi dhe drejtuesit e organizatës, ndërsa detajet financiare të marrëveshjes nuk janë bërë ende publike. Për 76ers, ardhja e një prej basketbollistëve më të mëdhenj të të gjitha kohërave shihet si një lëvizje që mund të ndryshojë ambiciet e skuadrës.

Në moshën 41-vjeçare, LeBron vazhdon të sfidojë rekordet e NBA-së. Ai është shënuesi më i mirë në historinë e ligës, me më shumë se 43 mijë pikë në karrierë, ndërsa mban rekorde të shumta për paraqitjet në All-Star, ekipet ideale të NBA-së dhe vazhdimësinë në nivelin më të lartë.

Katër herë kampioni i NBA-së ka fituar unazën me tri skuadra të ndryshme: Miami Heat, Cleveland Cavaliers dhe Los Angeles Lakers, duke u shpallur MVP i finales në të katër triumfet.

Me fanellën e Philadelphia 76ers, LeBron do të mbajë numrin 23 dhe do të bashkohet me yje si Joel Embiid dhe Tyrese Maxey. Tashmë pritshmëritë janë të mëdha, pasi një nga figurat më ikonike të basketbollit kërkon të shkruajë edhe një faqe tjetër në historinë e këtij sporti.