Angelina aspak e surprizuar me veset e Brad Pitt

Rikthimi i Brad Pitt te alkooli, pas shtatë vitesh larg tij, ka rikthyer në vëmendje edhe marrëdhënien e tij të trazuar me Angelina Jolie. Sipas burimeve pranë aktores, ky zhvillim nuk ka qenë aspak surprizë për të.

Një person i afërt me Jolie ka deklaruar se ajo e kishte konsideruar gjithmonë të mundur një rikthim të tillë dhe se kishte paralajmëruar prej kohësh se sfidat e aktorit nuk ishin zgjidhur plotësisht.

Sipas të njëjtit burim, Angelina beson se lënia e alkoolit nuk do të thotë domosdoshmërisht se një person ka ndryshuar rrënjësisht. Ajo mendon se problemet që çuan në krizën e tyre martesore kanë qenë shumë më të thella sesa varësia nga alkooli.

Historia mes dy yjeve mori fund në vitin 2016, kur Jolie kërkoi divorcin pas një incidenti gjatë një fluturimi privat, ku ajo e akuzoi Pitt për sjellje të dhunshme ndaj saj dhe fëmijëve të tyre. Aktori i ka mohuar vazhdimisht këto akuza.

Në vitet që pasuan, Brad Pitt foli hapur për betejën e tij me alkoolin dhe tregoi se takimet e Alkoolistëve Anonimë e kishin ndihmuar të qëndronte esëll. Megjithatë, në një intervistë të fundit për revistën Esquire, ai pranoi se i ishte rikthyer sërish konsumimit të alkoolit, një rrëfim që ka rikthyer interesin mbi jetën e tij personale dhe marrëdhënien me ish-bashkëshorten.