MARSELA LACA: MJESHTRJA QË SJELL DRITË DHE STIL NË ÇDO LOOK

Në valët e Radio Wave, atmosfera ishte plot ngjyra dhe energji, falë të ftuarës speciale Marsela Laca – e njohur ndryshe si Marsi i “Marsi Salon”. Me mbi 25 vite përvojë në botën e flokëve dhe të ngjyrave, ajo ndau me dëgjuesit këshilla të vlefshme për kujdesin, prerjen dhe stilimin e flokëve.

Gjatë bisedës, Marsi theksoi rëndësinë e prerjes së rregullt për ruajtjen e shëndetit dhe vitalitetit të flokëve. Sipas saj, ky është sekreti që ndihmon flokët të rriten më fort dhe më të bukur. “Nuk ka asnjë problem t’i presësh flokët, përkundrazi – prerja u jep jetë dhe forcë,” tha ajo gjatë intervistës.

Ekspertja ndau edhe ritmet e mirëmbajtjes sipas gjatësisë: flokët e shkurtër kërkojnë prerje mujore, ata mesatarë çdo dy muaj, ndërsa flokët shumë të gjatë mund të priten një herë në tre muaj – por gjithmonë me kujdes dhe produktet e duhura.

Një pjesë e veçantë e bisedës iu kushtua flokëve biondë, të cilët Marsi i konsideron si “flokë plot dritë dhe energji”, por që kërkojnë trajtim të veçantë për të shmangur dëmtimet. Ajo foli gjithashtu për flokët kaçurrela, duke theksuar se duhen prerë kur janë të lagur, për të ruajtur formën natyrale dhe elasticitetin e tyre.

Marsi rrëzoi edhe disa mite të vjetra, si besimi se flokët duhen prerë në hënë të plotë për t’u rritur më shpejt. “Floku nuk ka lidhje me hënën. Rritja dhe shëndeti i tij varen nga kujdesi i vazhdueshëm dhe përdorimi i produkteve cilësore,” u shpreh ajo.

Në përfundim të intervistës, mjeshtrja e flokëve bëri një apel për të gjitha vajzat dhe gratë: “Kujdesuni për flokët çdo ditë, përdorni shampo të përshtatshme dhe mos harroni që bukuria e tyre është një proces i përditshëm. Flokët janë pasqyra e shëndetit dhe e vetëbesimit.”

Një bisedë e ngrohtë dhe frymëzuese nga një grua që e njeh deri në detaj artin e bukurisë, duke sjellë në çdo fije drite, elegancë dhe dashuri për profesionin.