BBVK 5: alaudin hamiti zbulon profilin e parë të banorit

Edicioni i pestë i Big Brother VIP Kosova po merr formë dhe kurioziteti i publikut sa vjen e shtohet. Teksa puna për përzgjedhjen e banorëve vazhdon, moderatori Alaudin Hamiti ka lënë të kuptohet se kasti i këtij sezoni pritet të jetë ndër më të komentuarit.

Gjatë një bashkëbisedimi me ndjekësit në rrjetet sociale, Hamiti u pyet nëse mund të zbulonte të paktën një profil të banorëve të rinj. Përgjigjja e tij ishte e shkurtër, por mjaftueshëm për të ndezur diskutimet: “Zhigolo”.

Edhe pse nuk dha asnjë emër, moderatori konfirmoi se një prej konkurrentëve të këtij sezoni do të ketë këtë profil, duke lënë të kuptohet se BBVK 5 do të vijojë traditën e tij për të sjellë personazhe të pazakontë dhe histori që pritet të krijojnë debat.

Në sezonet e kaluara, formati është dalluar për përfshirjen e personazheve me profile të ndryshme, duke sfiduar shpesh tabu dhe duke sjellë në ekran histori që kanë tërhequr vëmendjen e publikut.

Ndërkohë, ende nuk është bërë publike data zyrtare e nisjes së spektaklit, por Alaudin Hamiti ka konfirmuar se Big Brother VIP Kosova 5 do të rikthehet gjatë vjeshtës. Po aq mister mbetet edhe studioja e re, pasi moderatori ka zgjedhur të mos zbulojë nëse këtë sezon do të ketë ndryshime në skenografinë e spektaklit.

Me zbulimin e profilit të parë, pritshmëritë për BBVK 5 janë rritur ndjeshëm, ndërsa fansat presin të mësojnë emrat që do të bëhen pjesë e reality show-t më të ndjekur në Kosovë.