CHRIS BROWN LEJOHET TË KTHEHET NË SHBA PAS AKUZAVE PËR SULM NË LONDËR

Këngëtari i famshëm amerikan Chris Brown ka marrë leje për t’u kthyer në Shtetet e Bashkuara, pasi një gjykatë britanike vendosi të ndryshojë kushtet e lirimit të tij me kusht. Megjithatë, vendimi vjen me detyrime të rrepta dhe një garanci të majme prej 5 milionë dollarësh.

Brown, i njohur për hitet si “Kiss Kiss” dhe “Under the Influence”, akuzohet për sulm ndaj producentit të muzikës Abraham Diaw, në një incident që ndodhi në klubin ekskluziv “Tape” në Mayfair të Londrës. Sipas aktakuzës, këngëtari e goditi Diaw disa herë në kokë me një shishe, ndërsa pamjet e kamerave të sigurisë tregojnë momentin kur ai i afrohet viktimës dhe e sulmon me grushte e shqelma, ndërsa ky i fundit ndodhej i shtrirë në dysheme.

Për pasojë, producenti ngriti një padi civile kundër Chris Brown në vlerën e 16 milionë dollarëve, duke pretenduar dëmtime serioze fizike dhe emocionale.

Gjatë seancës gjyqësore, gjykatësi Tony Baumgartner pranoi kërkesën e artistit për t’u kthyer në SHBA, por theksoi se ai duhet të respektojë rregulla të rrepta deri në gjyqin përfundimtar, i cili është planifikuar për tetorin e vitit të ardhshëm.

“Do të duhet të ktheheni në Mbretërinë e Bashkuar kur t’ju kërkohet ta bëni këtë dhe të paguani lirimin me kusht në përputhje me detyrimet që vijojnë,” deklaroi gjykatësi, duke e paralajmëruar Brownin se çdo shkelje do të kishte pasoja të menjëhershme ligjore.

Prokurorja Heidi Stonecliffe KC tha se ndryshimet në kushtet e lirimit ishin bërë “në rrethana të pazakonta”, duke theksuar se Chris Brown mbetet ende nën hetim aktiv.

Sipas vendimit, këngëtari:

• Duhet të qëndrojë në një adresë të miratuar nga gjykata;
• Nuk lejohet të hyjë në asnjë klub nate;
• Nuk mund të ketë asnjë kontakt me viktimën Abraham Diaw;
• Nuk mund të aplikojë për dokumente të reja udhëtimi ndërkombëtare;
• Dhe duhet të paraqitet personalisht në gjykatë më 28 janar.

Brown dhe bashkëpandehuri i tij, Omololu Akinlolu, kanë deklaruar të pafajshëm për akuzat e “shkaktimit të dëmtimeve të lehta dhe të rënda trupore”.

Ky zhvillim vjen pas një sërë polemikash që kanë ndjekur artistin gjatë viteve, duke përfshirë edhe incidentet e mëparshme të dhunës. Megjithatë, për momentin, ai ka fituar mundësinë të rikthehet në SHBA – por vetëm nën vëzhgimin e ngushtë të autoriteteve britanike dhe me një gjyq të rëndësishëm që e pret vitin e ardhshëm.