DUA LIPA NË KRYE TË LISTËS SË TË PASURVE PËR VITIN 2025

Superylli i muzikës pop, Dua Lipa, po vazhdon të shkëlqejë jo vetëm në skenë, por edhe në botën e biznesit. Këngëtarja me origjinë shqiptare ka zënë vendin e parë në “Listën e të Pasurve” për vitin 2025, të përgatitur nga revista prestigjioze Heat, duke lënë pas emra të mëdhenj të showbiz-it britanik.

Sipas raportit të publikuar nga DailyMail, pasuria e Duas është vlerësuar në plot 151 milionë euro, çka e bën atë personazhin më të pasur nën moshën 30-vjeçare në Mbretërinë e Bashkuar dhe Irlandë. Ky është një sukses i jashtëzakonshëm për artistën, e cila këtë vit ka përjetuar periudhën më të frytshme të karrierës së saj.

Turneu botëror “Radical Optimism” i ka sjellë fitime rekord prej rreth 97 milionë euro, ndërsa përveç muzikës, Dua ka shtrirë ndikimin e saj në fusha të tjera. Ajo ka ndërtuar një perandori të vërtetë përmes projekteve si podcasti i saj, klubi i librave dhe bashkëpunimet me marka luksoze si Porsche dhe Versace.

Pas saj në renditje qëndron aktori i famshëm Tom Holland, me një pasuri prej 43 milionë euro. Ai vazhdon të përfitojë nga sukseset e filmave “Spider-Man”, si dhe nga bizneset e tij, përfshirë markën e birrës pa alkool që ka fituar popullaritet të madh.

Në vendin e tretë është këngëtari Lewis Capaldi me 41 milionë euro, ndërsa pesëshen e parë e plotësojnë Millie Bobby Brown me 28 milionë euro dhe çifti Molly-Mae Hague dhe Tommy Fury me 26 milionë euro.

Në listë janë futur për herë të parë emra të rinj që po ngjiten me shpejtësi në botën e famës, si aktorja Anya Taylor-Joy, ylli i serialit “The White Lotus” Leo Woodall dhe këngëtarja Holly Humberstone, e cila ka ndërtuar një pasuri prej 4.8 milionë euro falë koncerteve me Olivia Rodrigo dhe Taylor Swift.

Ndërkohë, podkasteri Steven Bartlett është shpallur si zëri më i paguar në Britani, me një pasuri prej 42 milionë euro. Podcasti i tij “Diary of a CEO” gjeneron rreth 17.4 milionë euro në vit vetëm nga reklamat, duke e bërë një ndër historitë më të suksesshme të medias digjitale.

Në fund të listës së 30 më të pasurve ndodhet Amber Davies, ish-ylli i “Love Island” dhe pjesëmarrëse aktuale në “Strictly Come Dancing”, e cila ka arritur të grumbullojë një pasuri prej rreth 2 milionë euro. Një dëshmi se fama televizive, kur shfrytëzohet me zgjuarsi, mund të kthehet në fitim të vërtetë.

Dua Lipa, nga ana tjetër, duket se po e ngjit gjithnjë e më lart standardin e suksesit për artistët e rinj. Me çdo projekt të ri, ajo po dëshmon se është shumë më tepër sesa një këngëtare – është një markë globale që po pushton çdo aspekt të industrisë së argëtimit.