“Është Tom Cruise?” Imituesi i “Maverick” huton tifozët

Një imitues i Tom Cruise ka shkaktuar konfuzion të madh gjatë një ndeshjeje të San Francisco Giants, pasi u shfaq në fushë i veshur si Pete “Maverick” Mitchell, personazhi ikonë i “Top Gun”.

Paraqitja u organizua në kuadër të 40-vjetorit të filmit, por ngjashmëria e jashtëzakonshme e imituesit me aktorin e Hollywood-it bëri që disa tifozë të pyesnin nëse kishin përballë vetë Tom Cruise.

Komentet në rrjetet sociale ishin të shumta. Disa fansa e krahasuan pamjen e tij me atë të aktorit, ndërsa të tjerë shkuan edhe më tej, duke pyetur nëse bëhej fjalë për një imitues apo për një krijim të inteligjencës artificiale.

Personi që qëndron pas këtij spektakli është Jerome LeBlanc, i njohur si “Tom Cruise i Kalifornisë”. Ai tregon se gjithçka nisi pasi njerëzit i përsërisnin vazhdimisht se kishte ngjashmëri me yllin e “Top Gun” dhe “Risky Business”.

Pasi u zhvendos nga Montreali në Los Anxhelos, LeBlanc vendosi ta shndërronte këtë ngjashmëri në një mundësi profesionale. I veshur si Maverick, ai nisi të performonte në rrugët e qytetit dhe kuptoi se mund të fitonte më shumë se në punën e tij si barist.

Edhe pse diferenca në moshë e bën të vështirë që njerëzit ta ngatërrojnë realisht me Cruise, ngjashmëria mbetet aq e fortë sa shumë kalimtarë ndalojnë për ta parë dy herë.

Sot, LeBlanc ka ndërtuar edhe një komunitet të madh në rrjetet sociale, veçanërisht në TikTok, ku ndiqet nga më shumë se 770 mijë persona.