Morgan Freeman, nga Hollywood-i te blues-i në moshën 89-vjeçare

Morgan Freeman po shkruan një tjetër kapitull në karrierën e tij, këtë herë larg kinemasë. Në moshën 89-vjeçare, aktori legjendar ka publikuar një projekt muzikor të dedikuar një prej pasioneve të tij më të mëdha: blues-it.

“‘Morgan Freeman’s Symphonic Blues Experience’” është albumi i ri ku Freeman shërben si narrator dhe producent. Projekti, i publikuar më 7 gusht, përmban 12 këngë dhe përshkon rreth një shekull histori të blues-it.

Në album marrin pjesë emra të njohur të këtij zhanri, mes tyre Taj Mahal, Keb’ Mo’ dhe Lawrence “Boo” Mitchell, ndërsa projekti shoqërohet nga Chineke! Orchestra, duke i dhënë muzikës një dimension simfonik.

Për Freeman, lidhja me blues-in është shumë personale. Ai e ka përshkruar këtë muzikë si pjesë të jetës së tij që nga fëmijëria, kur e dëgjonte në verandën e gjyshes së tij në Misisipi. Përmes albumit, aktori synon të sjellë te publiku historitë dhe traditën që fshihen pas këtij zhanri.

Një nga pjesët më të veçanta të projektit është “Death Letter Blues”, kënga e lidhur me legjendën e blues-it Son House dhe me traditën muzikore të Misisipit.

Por aventura muzikore nuk ndalet vetëm te albumi. Freeman ka nisur edhe një seri koncertesh në qytete të ndryshme të Shteteve të Bashkuara, duke dëshmuar se pas një karriere të jashtëzakonshme në Hollywood, ai ka ende histori për të treguar, këtë herë përmes tingujve të blues-it.