Harry Styles “pushton” Wembley-n, organizatorët marrin vendimin e pazakontë për mijëra fansa

Harry Styles po vazhdon të shkruajë histori me rezidencën e tij gjigante në stadiumin Wembley, por koncerti i kësaj mbrëmjeje nuk do të jetë si gjithë të tjerët. Për shkak të valës së të nxehtit që ka përfshirë Londrën, organizatorët kanë vendosur të ndryshojnë disa nga rregullat e stadiumit për të garantuar sigurinë dhe komoditetin e fansave.

Ylli britanik, i cili po performon në kuadër të turneut rekordthyes “Together, Together”, pritet të ngjitet sërish në skenë përpara dhjetëra mijëra spektatorëve, ndërsa këngëtarja legjendare Shania Twain do të ngrohë atmosferën si artiste mbështetëse.

Me temperaturat që po kalojnë kufirin e 30 gradëve Celsius, Wembley ka lehtësuar rregullat për hyrjen me ujë. Fansat do të lejohen të sjellin shishe metalike dhe plastike të forta, të cilat mund t’i rimbushin falas në stacionet e ujit të vendosura në të gjithë stadiumin. Gjithashtu, do të pranohen edhe shishe plastike të buta deri në 500 ml.

Organizatorët kanë njoftuar edhe një ulje prej 50 për qind të çmimit të ujit të ambalazhuar që shitet brenda stadiumit, ndërsa spektatorët do të kenë në dispozicion pika falas për furnizim me ujë dhe krem mbrojtës kundër diellit.

Përmes një apeli drejtuar publikut, autoritetet kanë këshilluar fansat të qëndrojnë të hidratuar, të përdorin mbrojtje ndaj diellit dhe të shmangin qëndrimin e gjatë në temperatura të larta para hyrjes në stadium.

Rezidenca e Harry Styles në Wembley ka nisur më 12 qershor dhe po rezulton një nga ngjarjet muzikore më të mëdha të verës në Britani. Pas koncertit të kësaj mbrëmjeje, artisti do të rikthehet në skenën e stadiumit edhe në datat 26, 27 dhe 29 qershor, si dhe më 1, 3 dhe 4 korrik.