Harry Styles rrëzohet në skenë

Harry Styles u përball me një incident të papritur gjatë koncertit të tij në Mexico City, kur humbi ekuilibrin dhe u rrëzua në skenë vetëm pak çaste pasi nisi performancën.

Artisti britanik reagoi menjëherë, u ngrit pa humbur ritmin dhe vazhdoi këngën sikur asgjë të mos kishte ndodhur, duke fituar duartrokitjet e publikut. Koncerti ishte i dyti nga gjashtë netët e planifikuara në kryeqytetin meksikan, në kuadër të turneut botëror “Together, Together”.

Sipas raportimeve të mediave lokale, sipërfaqja e skenës ishte bërë e rrëshqitshme për shkak të shiut, çka dyshohet se shkaktoi rrëzimin e këngëtarit.

Me humor, Styles e ktheu situatën në favorin e tij, duke iu drejtuar fansave me batutën: “Tani që u rrëzova, mund të them se më në fund u njohëm vërtet. Tani ndihem shumë rehat.”

Pamjet e incidentit u shpërndanë me shpejtësi në rrjetet sociale, ku fansat vlerësuan gjakftohtësinë dhe profesionalizmin e Harry Styles. Shumë prej tyre kujtuan se artisti ka kaluar edhe më parë situata të ngjashme në skenë, që prej kohës kur ishte pjesë e grupit One Direction.