JON BON JOVI REFUZON NDËRHYRJET ESTETIKE: “NUK MË INTERESON BOTOKSI, FLOKËT I KAM TË THINJUR DHE KRENAR PËR TO”

Rock legjenda Jon Bon Jovi ka folur me sinqeritet për procesin e plakjes dhe raportin e tij me pamjen fizike, gjatë një interviste të fundit në podcastin “How to Fail”. Në moshën 68-vjeçare, ai pranon se do të donte të dukej si dikur, por thekson se kurrë nuk do t’i nënshtrohej ndërhyrjeve estetike.

“E përballoj mirë këtë gjë, nuk do të shkoj kurrë tek operacionet. Flokët i kam të thinjur dhe së paku ende i kam,” tha ai me humor. “Nuk kam bërë asnjë operacion, as injeksione botoksi, as ndërhyrje në sy apo buzë. Asgjë nga kjo nuk më intereson dhe nuk do ta bëja kurrë.”

Këngëtari zbuloi se para më shumë se një dekade vendosi të mos i ngjyrosë më flokët. “E urrej ngjyrosjen e flokëve. Rreth 12-13 vite më parë thashë: ‘Le të shkojë ku të dojë’. Nuk doja ta bëja dhe kështu u detyrova të pranoj plakjen,” rrëfeu ai.

Edhe pse e pranon me qetësi moshën, Bon Jovi nuk fsheh nostalgjinë për pamjen e dikurshme. “Shikoj fotot e mia tani dhe nuk jam i lumtur. Shikoj veten në 30, 40, 50 vjeç dhe them: ‘Po, do të doja të dukesha kështu’, por nuk dukem,” u shpreh ai me sinqeritet.

Megjithatë, për artistin, prioritet mbetet shëndeti. “Disa vitet e ardhshme mund të jenë të mrekullueshme nëse jam mirë fizikisht. Shëndeti është numër një. Gjithmonë mund të fitosh para, gjithmonë mund të shkruash një këngë tjetër. Por shëndeti yt është çelësi i gjithçkaje.”

Përveç reflektimeve mbi plakjen, Jon Bon Jovi foli me emocion edhe për rolin e ri në jetën e tij — atë të gjyshit. Djali i tij, Jake Bongiovi, dhe aktorja Millie Bobby Brown, këtë verë kanë adoptuar një vajzë, duke sjellë një kapitull të ri në familjen e artistit legjendar.