Justin dhe Hailey Bieber festojnë tetë vite martesë

Justin Bieber dhe Hailey Bieber kanë shënuar përvjetorin e tyre të tetë të martesës me një moment romantik, të ndarë me fansat në rrjetet sociale.

Këngëtari publikoi disa fotografi nga një mbrëmje e qetë në shoqërinë e bashkëshortes së tij, ku çifti shfaqet duke luajtur bilardo, duke u përqafuar dhe duke shkëmbyer puthje. Atmosfera e relaksuar i dha postimit një tjetër dimension, larg shkëlqimit të zakonshëm të jetës së tyre publike.

Në përshkrimin e fotove, Justin zgjodhi një mesazh të shkurtër, por domethënës, duke i shprehur dashurinë Hailey-t dhe duke folur për një kapitull të ri në jetën e tyre së bashku.

Hailey, nga ana tjetër, e shoqëroi momentin romantik me humor. Në komentet e postimit ajo bëri një shaka për lojën e bilardos, duke treguar edhe një herë anën e tyre më spontane dhe lozonjare si çift.

Justin dhe Hailey u martuan në vitin 2018, vetëm pak muaj pas fejesës së tyre në Bahamas. Dyshja ishte njohur prej vitesh përpara se marrëdhënia e tyre të merrte një kthesë romantike dhe të çonte shpejt drejt martesës.

Jeta e çiftit mori një tjetër kapitull të rëndësishëm në vitin 2024, kur ata njoftuan se po prisnin fëmijën e tyre të parë. Lajmin e bënë publik përmes disa imazheve të realizuara në Hawaii, ku Hailey shfaqej me barkun e rrumbullakosur.