MARIAH CAREY FITON BETEJËN LIGJORE NDAJ VËLLAIT

Mariah Carey ka shënuar një fitore të rëndësishme në gjykatë, duke i dhënë fund, të paktën në shkallën e parë, një beteje ligjore pesëvjeçare me vëllain e saj, Morgan Carey. Gjykata në Nju Jork ka rrëzuar pretendimet e tij për shpifje, të lidhura me disa nga rrëfimet e përfshira në librin autobiografik të këngëtares.

Konflikti nisi pas publikimit, në vitin 2020, të librit The Meaning of Mariah Carey, ku artistja rrëfen episode nga jeta e saj personale dhe marrëdhëniet familjare. Morgan pretendonte se disa prej deklaratave të së motrës e portretizonin në mënyrë të rreme dhe dëmtonin reputacionin e tij. Për këtë arsye, ai kërkoi dëmshpërblim që në raportimet mediatike është vlerësuar në rreth 20 milionë dollarë.

Mes pretendimeve që u kundërshtuan në gjykatë ishin pasazhe që lidhnin Morganin me shitjen e kokainës në klubet e natës gjatë viteve ’80, si edhe referenca për një periudhë të mundshme burgimi. Ai këmbëngulte se këto përshkrime ishin të pavërteta dhe i kishin shkaktuar dëme personale e profesionale.

Më 19 tetor 2026, gjyqtari Leslie A. Stroth vendosi se pretendimet e mbetura nuk përmbushnin standardin ligjor të nevojshëm për të vazhduar çështjen. Sipas vendimit, Morgan nuk kishte paraqitur prova të mjaftueshme se Mariah kishte bërë deklarata duke e ditur se ishin të rreme ose duke shpërfillur me vetëdije vërtetësinë e tyre.

Nga ana e saj, mbrojtja e këngëtares e mirëpriti vendimin, duke theksuar rëndësinë e së drejtës së autorëve për të rrëfyer histori me interes publik. Megjithatë, beteja mund të mos jetë mbyllur përfundimisht, pasi avokati i Morganit ka bërë të ditur se synon ta apelojë vendimin.

Për Mariah Carey-n, kjo është një fitore e rëndësishme pas vitesh përballjesh në sallat e gjyqit. Por përtej famës, suksesit dhe miliona albumeve të shitura, kjo histori rikthen në vëmendje një realitet të vështirë: kur konfliktet familjare përfundojnë në gjykatë, edhe kujtimet më personale mund të kthehen në një betejë publike.