Matt Damon zbulon sekretin e “The Odyssey”

Matt Damon ka zbuluar një nga prapaskenat më interesante të filmit të shumëpritur “The Odyssey”, duke treguar se në disa prej skenave nuk ishte ai që shfaqej para kamerës, por dublantja e tij, Devyn Dalton.

Aktori 55-vjeçar iu nënshtrua një transformimi fizik që zgjati gjashtë muaj për të interpretuar Odiseun në adaptimin e ri të veprës së Homerit, me regji të Christopher Nolan. Damon humbi rreth 15 kilogramë për këtë rol, por pranoi se në skenat ku personazhi përballet me gjigantët Laestrygonë, regjisori përdori një zgjidhje të pazakontë për të krijuar iluzionin e përmasave.

Sipas Damon, Nolan zgjodhi që dublantja e tij të ishte Devyn Dalton, një artiste profesioniste e skenave të rrezikshme, për shkak të trupit dhe fizikut të saj. Aktori madje bëri shaka se në ato skena ku publiku mendon se po sheh muskujt e tij, në fakt janë krahët e Dalton.

Ai nuk kurseu fjalët e mira për kolegen, duke treguar se e falënderoi personalisht sapo u takuan në sheshxhirim dhe vlerësoi punën e saj në realizimin e skenave sfiduese.

Edhe Devyn Dalton konfirmoi pjesëmarrjen në projekt përmes një postimi në Instagram, ku ndau fotografi nga xhirimet në Malësitë e Skocisë. Ajo e përshkroi eksperiencën si një aventurë të paharrueshme dhe falënderoi ekipin për bashkëpunimin, duke e cilësuar punën në “The Odyssey” si një nga eksperiencat më të veçanta të karrierës së saj.

Filmi i Christopher Nolan mbetet një nga projektet më të shumëpritura të vitit, ndërsa detaje të reja nga prapaskenat po rrisin edhe më shumë kuriozitetin e publikut.