Mbrëmje emocionesh në Europë: Festë për Dritën, lot për Egnatian

Futbolli shqiptar përjetoi një mbrëmje me emocione të forta në arenën europiane. Drita e Kosovës siguroi një kualifikim dramatik në raundin e tretë të Ligës së Konferencës, ndërsa Egnatia u nda me Ligën e Kampionëve pas një eliminimi të dhimbshëm me penallti.

Skuadra nga Gjilani përmbysi gjithçka ndaj Florianës, duke fituar 2-1 pas kohës shtesë. Maltezët kaluan të parët në avantazh në fundin e pjesës së parë, por Drita reagoi në momentet vendimtare. Ovouaka u bë njeriu i ndeshjes, fillimisht duke asistuar golin e barazimit të Jorgo Pëllumbit në minutën e 88-të dhe më pas duke detyruar një autogol që vulosi kualifikimin. Në raundin e tretë, Drita do të përballet me skuadrën e San Marinos, Tre Fiori.

Nga ana tjetër, Egnatia luftoi deri në fund për të mbajtur gjallë ëndrrën në Ligën e Kampionëve, por u ndal nga Celje vetëm pas gjuajtjeve të penalltive. Gabimet nga pika e bardhë rezultuan vendimtare dhe kampionët e Shqipërisë u eliminuan pas një sfide të luftuar deri në sekondën e fundit.

Megjithatë, aventura europiane për Egnatian vazhdon. Kampionët shqiptarë do të zbresin tani në raundin e tretë kualifikues të Ligës së Evropës, ku i pret përballja me Shamrock Rovers, me synimin për të vazhduar rrugëtimin në kompeticionet kontinentale.