Për shkak të Loredanës? Adeyemi tregon të vërtetën pas gjobës së majme

Karim Adeyemi ka vendosur të flasë hapur për incidentin që e çoi përballë autoriteteve dhe që përfundoi me një gjobë të konsiderueshme financiare. Futbollisti i Borussia Dortmundit ndau versionin e tij të ngjarjes në dokumentarin e Amazon Prime, “Loredana & Karim – Dashuri & Drama”.

Sulmuesi gjerman tregoi se gjithçka nisi nga një porosi e bërë online, e cila më pas u bë objekt hetimi. Në atë periudhë, ai ndodhej me pushime, ndërsa partnerja e tij, këngëtarja e njohur Loredana, ishte e angazhuar me xhirime televizive. Sipas çiftit, pakot e porositura u morën nga një mik i tyre dhe iu dorëzuan më pas.

Adeyemi rrëfeu se u surprizua nga përmbajtja e kutisë, ku ndodheshin disa pajisje që nuk i kishte pritur. Ai shpjegoi se bëhej fjalë për një “kuti surprizë” të porositur në një faqe interneti, ku përmbajtja nuk dihej paraprakisht.

Futbollisti theksoi se qëllimi i tij nuk kishte qenë i keq dhe se gjithçka lidhej me shqetësimin për sigurinë e Loredanës, e cila për shkak të famës së saj përballet shpesh me vëmendje të madhe publike.

“Për mua ishte e rëndësishme që njerëzit e afërt të ndiheshin të sigurt. Nëse diçka shitej lirshëm online, mendova se nuk mund të ishte e ndaluar”, shprehet Adeyemi në dokumentar.

Rrëfimi i tij ka rikthyer në vëmendje një nga episodet më të komentuara të jetës së çiftit, ndërsa dokumentari vazhdon të zbulojë detaje të panjohura nga marrëdhënia e tyre dhe sfidat që kanë përjetuar larg fushës së futbollit dhe skenës muzikore.