“The Real Rooneys” hap dyert e familjes Rooney – pritshmëri të mëdha dhe polemika për sa “real” është dokumentari

Një prej familjeve më të famshme të Britanisë hap për herë të parë dyert e shtëpisë së saj në serialin e ri dokumentar “The Real Rooneys”, që transmetohet në Disney+. Wayne dhe Coleen Rooney kanë lejuar kamerat të ndjekin jetën e tyre familjare, marrëdhënien në çift, katër djemtë dhe ndryshimet profesionale që po përjetojnë.

Seriali vjen në një moment të rëndësishëm për familjen. Wayne Rooney po largohet nga menaxhimi i futbollit dhe po përballet me një kapitull të ri profesional, ndërsa Coleen po zgjeron aktivitetet e saj jashtë televizionit, përfshirë një linjë të sajën me Primark. Në fokus është edhe djali i tyre i madh, Kai, i cili po ndjek ëndrrën për t’u bërë futbollist.

Pritshmëritë për serialin kanë qenë të larta pikërisht sepse Rooney-t kanë qenë tradicionalisht më të rezervuar me jetën e tyre private. Promovimi i Disney+ premton një portret më të drejtpërdrejtë të familjes, me momente nga jeta e përditshme, debatet në çift, pushimet, festimet dhe marrëdhënien e tyre me katër fëmijët.

Por pikërisht këtu nis edhe polemika kryesore: sa “real” është një reality show kur personazhet e dinë se janë duke u filmuar? “The Guardian” e ka vlerësuar serialin për humorin dhe vetëironinë e çiftit, por ka vënë në pikëpyetje pretendimin për autenticitet të plotë, duke e përshkruar programin si më të kontrolluar nga sa sugjeron titulli.

Edhe kritikat e tjera kanë qenë të përziera. “The Independent” e ka cilësuar serialin kaotik dhe argëtues, ndërsa disa vëzhgime kanë ngritur pikëpyetje nëse dokumentari paraqet një version të kuruar të jetës luksoze të familjes, në vend të një pasqyre plotësisht të pakontrolluar të realitetit.

Në qendër mbetet gjithsesi një çift që ka kaluar prej vitesh nën vëmendjen e pandërprerë të mediave britanike. Wayne ka folur publikisht për gabimet e së kaluarës dhe vështirësitë në martesë, ndërsa Coleen ka përjetuar vetë një prej përplasjeve më të mëdha mediatike të viteve të fundit, përfshirë çështjen “Wagatha Christie”. Tashmë, me “The Real Rooneys”, çifti pretendon se publiku do të shohë një version më personal të jetës së tyre, ndërsa pyetja që mbetet është nëse kamerat kanë vërtet hyrë pas fasadës së famës apo thjesht kanë krijuar një tjetër version të saj.