Top Channel merr vendim përfundimtar, Laert Vasili largohet nga Për’Puthen pas incidentit në studio

Aktori dhe opinionisti Laert Vasili nuk do të jetë më pjesë e emisionit Për’Puthen. Lajmi u konfirmua gjatë transmetimit të fundit, ku produksioni bëri të ditur se bashkëpunimi me të është ndërprerë pas një ngjarjeje të debatueshme në studio.

Gjatë puntatës, u transmetua një video-mesazh nga Vasili, në të cilën ai shprehu falënderime për eksperiencën në program dhe pranoi gabimin e tij. Ai kërkoi ndjesë ndaj konkurrentëve, veçanërisht ndaj Esme, duke theksuar se askush nuk është i pagabueshëm dhe se çdo veprim i gabuar duhet të marrë përgjegjësi.

Pas videos, Esme reagoi duke thënë se kërkimi i faljes i ishte dukur i sinqertë. Megjithatë, moderatorja Megi Pojani sqaroi se sjellja e opinionistit nuk përputhej me standardet dhe vlerat e emisionit dhe të Top Channel, duke theksuar se vendimi për largimin e tij ishte i pakthyeshëm.

Incidenti ndodhi gjatë një debati mes Esmes dhe një prej djemve konkurrentë. Në përpjekje për të ilustruar mendimin e tij, Vasili deklaroi se ekzistonte vetëm një mënyrë për të ndalur një grua, më pas u ngrit dhe e puthi pa paralajmërim. Ky veprim shkaktoi reagime të menjëhershme, ndërsa për disa minuta studioja mbeti e tensionuar.

Fillimisht, ai e justifikoi gjestin si një demonstrim artistik, duke u shprehur se kishte vepruar si aktor për të dhënë një shembull. Megjithatë, pas reagimit të fortë të Esmes, e cila u shpreh e tronditur dhe e papërgatitur për situatën, Vasili kërkoi sërish falje.

Me vendimin e fundit të produksionit, rrugëtimi i tij në këtë format televiziv është mbyllur përfundimisht.