“Toy Story 5” shpërthen para premierës, Disney gati për një tjetër rekord të madh në kinema

Magjia e lodrave duket se është më e fortë se kurrë. “Toy Story 5” ka nisur rrugëtimin e tij në mënyrë spektakolare, duke regjistruar shifra mbresëlënëse që para daljes zyrtare në kinema.

Filmi i ri i Disney dhe Pixar ka siguruar rreth 15.2 milionë euro nga para-shfaqjet, duke vendosur rezultatin më të lartë të vitit 2026 dhe duke lënë pas disa prej hiteve më të mëdha të muajve të fundit. Entuziazmi i publikut ka qenë aq i madh, sa analistët presin që fundjava e hapjes të sjellë një debutim rekord për këtë kapitull të ri të sagës së famshme.

Sipas parashikimeve, “Toy Story 5” mund të arkëtojë mbi 130 milionë euro vetëm në tregun amerikan, ndërsa në nivel global shifrat mund të kalojnë 239 milionë euro që në ditët e para të shfaqjes.

Këtë herë, Woody, Buzz dhe miqtë e tyre përballen me një sfidë krejtësisht moderne. Teknologjia bëhet “armiku” i ri i lodrave, ndërsa një tablet inteligjent i quajtur Lilypad trazon ekuilibrat e botës së tyre dhe ndryshon mënyrën se si fëmijët argëtohen.

Në kastin e zërave rikthehen emrat ikonë që kanë shoqëruar serinë ndër vite, mes tyre Tom Hanks, Tim Allen dhe Joan Cusack, ndërsa aventura pasurohet edhe me emra të rinj si Conan O’Brien dhe Greta Lee.

Pas suksesit gjigant të “Toy Story 4”, i cili pushtoi arkat botërore, Disney duket se ka në duar një tjetër hit të garantuar. Me kritika pozitive dhe interes të jashtëzakonshëm nga publiku, “Toy Story 5” po shihet si një nga filmat që mund të dominojë verën e këtij viti dhe të thyejë rekorde të reja në box office.