Botërori 2026 hyn në histori! Thyhet rekordi i golave para përfundimit të turneut

Kupa e Botës 2026 vazhdon të shkruajë histori. Turneu ka vendosur zyrtarisht një rekord të ri, duke u bërë edicioni me më shumë gola të shënuar ndonjëherë në historinë e Kampionateve Botërore.

Momenti historik erdhi gjatë sfidës së Grupit D mes Shteteve të Bashkuara dhe Turqisë, kur Auston Trusty realizoi golin e 173-të të turneut, duke kaluar rekordin prej 172 golash që ishte vendosur në Botërorin e Katarit në vitin 2022.

Ajo që e bën këtë arritje edhe më mbresëlënëse është fakti se rekordi u thye që në ndeshjen e 59-të të kompeticionit. Në krahasim, Botërori i Katarit kishte nevojë për të gjitha 64 ndeshjet për të arritur në shifrën e 172 golave.

Me formatin e ri prej 48 kombëtaresh dhe plot 104 ndeshje në total, Botërori 2026 ka sjellë më shumë spektakël, më shumë emocione dhe një ritëm të lartë ofensiv që po kënaq tifozët në mbarë botën.

Për rekordin reagoi edhe presidenti i FIFA-s, Gianni Infantino, i cili e cilësoi këtë arritje si një dëshmi të futbollit spektakolar që ka karakterizuar këtë edicion. Sipas tij, numri rekord i golave është një tjetër arsye pse Kupa e Botës 2026 do të mbahet mend si një nga turnetë më emocionues në histori.