Gjesti mungon në gjykatë, REAGON PROKURORI

Seanca gjyqësore ndaj këngëtarit Besart Kelmendi, i njohur si Gjesti, nuk është zhvilluar në Gjykatën Themelore në Prishtinë, pasi artisti nuk u paraqit në sallën e gjyqit.

Gjesti përballet me akuza për “Armëmbajtje pa leje”, “Kanosje” dhe “Asgjësim apo dëmtim të pasurisë”, ndërsa në seancë mungoi edhe përfaqësuesi i palës së dëmtuar.

Sipas avokatit të tij, Burim Azemi, këngëtari e kishte njoftuar pak para seancës se ndodhej në Shqipëri për shkak të një angazhimi muzikor dhe nuk kishte mundësi të ishte i pranishëm në gjykatë. Mbrojtja tha se nuk mund të vlerësonte nëse arsyet e mungesës ishin objektive apo subjektive.

Për shkak të mungesës së të akuzuarit, gjykata e shtyu seancën, ndërsa gjyqtarja Edita Çanta paralajmëroi se në rast se Gjesti nuk paraqitet edhe në seancën e ardhshme, mund të lëshohet urdhër për shoqërimin e tij me detyrim.

Çështja lidhet me një incident të ndodhur më 11 mars 2026 në ambientet e studios “Onima”, ku artisti akuzohet se ka kërcënuar stafin me armë, duke kërkuar një person për shkak të një borxhi, si dhe ka shkaktuar dëme materiale në studio.

Edhe pse më herët ndaj tij ishte caktuar masa e paraburgimit, Gjesti u lirua pas arritjes së një marrëveshjeje me prokurorinë për pranimin e fajësisë. Tashmë, vëmendja mbetet te seanca e radhës, e cila mund të jetë vendimtare për vijimin e procesit gjyqësor.