James Franco rikthehet fuqishëm në Hollywood pas skandaleve

Pas vitesh larg vëmendjes së studiove të mëdha dhe mes polemikave që tronditën karrierën e tij, James Franco duket se është gati të hapë një kapitull krejt të ri në Hollywood.

Aktori 48-vjeçar është shfaqur në tapetin e Cannes Film Festival krah partneres së tij afatgjatë, Izabel Pakzad, duke tërhequr menjëherë vëmendjen e mediave ndërkombëtare. Por këtë herë, prania e tij nuk kishte të bënte vetëm me glamurin e festivalit.

Franco ka zbuluar se po rikthehet zyrtarisht në një prodhim të madh studiosh, diçka që nuk kishte ndodhur që prej filmit The Disaster Artist, projekti që shënoi një nga momentet më të forta të karrierës së tij.

Edhe pse ka zgjedhur të mbajë sekret detajet e projektit të ri, aktori ka lënë të kuptohet se publiku do ta shohë shumë shpejt sërish në ekranet e mëdha, me premierën që pritet mes fundit të këtij viti ose gjatë vitit 2027.

Kthimi i tij vjen pas një periudhe të vështirë, ku emri i aktorit u përfshi në akuza dhe procese që ndikuan ndjeshëm në praninë e tij në industrinë amerikane të filmit. Megjithatë, Franco këmbëngul se nuk është larguar kurrë realisht nga skena.

Sipas vetë aktorit, ai ka qenë prezent çdo vit në Cannes, duke zhvilluar takime, prezantuar ide dhe negociuar projekte të reja larg zhurmës mediatike.

Tani pyetja që po qarkullon në Hollywood është vetëm një: a do të jetë ky rikthimi që do ta vendosë sërish James Franco mes emrave më të mëdhenj të industrisë?