Monika Kryemadhi plas deklaratën për çiftin e BBVIP: “Do ndahen”

Monika Kryemadhi nuk i kurseu komentet pikante për ish-banorët e “Big Brother VIP” gjatë një interviste në emisionin “Andale”, ku foli hapur për eksperiencën e saj si analiste në edicionin e pestë të spektaklit.

E pyetur se cili çift mendon se nuk do t’i mbijetojë jetës jashtë shtëpisë, ajo nuk u mendua gjatë dhe përmendi menjëherë emrat e Mateo-s dhe Brikenës, duke deklaruar se sipas saj lidhja mes tyre nuk do të zgjasë.

“Mateo dhe Brikena do ndahen”, u shpreh Kryemadhi, duke ndezur menjëherë diskutime në rrjet dhe mes ndjekësve të formatit.

Sipas saj, marrëdhënia e tyre nuk ka qenë aq spontane dhe reale sa është perceptuar nga publiku. Ajo tha se ka qenë skeptike që në fillim për mënyrën si u krijua afrimiteti mes tyre dhe la të kuptohet se gjithçka mund të ketë qenë më shumë pjesë e lojës sesa një histori e sinqertë dashurie.

Kryemadhi deklaroi se nuk e ka ndjerë kurrë Mateo-n plotësisht të përfshirë emocionalisht në raport, ndërsa shtoi se Brikena dukej më e investuar në këtë marrëdhënie.

“Kam pasur gjithmonë dyshime. Më është dukur sikur ai e përdori raportin si pjesë të lojës”, tha ajo gjatë intervistës, duke i hedhur edhe më shumë benzinë debatit që vazhdon prej javësh në rrjetet sociale.

Deklaratat e saj kanë rikthyer sërish në fokus diskutimin klasik të reality show-ve: sa prej lidhjeve të krijuara para kamerave janë reale dhe sa janë të ndërtuara për vëmendje, klikime dhe famë pas spektaklit.

Dhe mesa duket, për Monika Kryemadhin, historia Mateo–Brikena është larg të qenit një “happy ending”.