MOTRAT BERISHA DËNOHEN PËR SULMIN NDAJ BLOGERES KLEA PRENGA

Drama, xhelozi dhe dhunë – kjo është përmbledhja e historisë që ka pushtuar faqet rozë muajt e fundit. Gjykata e Tiranës ka dhënë vendimin për motrat Mariela dhe Antonela Berisha, të cilat u gjykuan për sulmin e dhunshëm ndaj blogeres Klea Prenga, një ngjarje që tronditi publikun në gusht të vitit 2024.

Sipas burimeve nga gjykata, Mariela Berisha është dënuar me 3 vite burg, por për shkak të gjykimit të shkurtuar, dënimi i saj është ulur në 2 vite. Ndërkohë, Antonela Berisha ka marrë 3 vite shërbim prove, të cilat po ashtu janë reduktuar në 2 vite.

Ngjarja e bujshme nisi pas dyshimeve të Marielës se bashkëshorti i saj e tradhtonte me 24-vjeçaren Klea Prenga. Në shenjë hakmarrjeje, dy motrat – të njohura në rrethin e tyre për karakterin impulsiv – kanë shkuar në një restorant luksoz në Tiranë, ku ndodhej blogerja, dhe e kanë goditur me një shishe qelqi në fytyrë, duke i shkaktuar plagosje të rëndë.

Pas incidentit, motrat Berisha u shpallën në kërkim, por pas dy muajsh u vetëdorëzuan në polici, duke përballuar akuzat për “plagosje të rëndë me dashje”.

Ngjarja u kthye shpejt në një senzacion mediatik, me videot dhe komentet që pushtuan rrjetet sociale. Fansat e Klea Prengës kërkuan drejtësi për blogeren, e cila më vonë ndau me ndjekësit e saj një mesazh emocional për përballimin e traumës dhe rikthimin në jetën publike.

Historia e motrave Berisha mbetet një nga rastet më të bujshme të viteve të fundit në showbiz-in shqiptar – një përplasje ku dashuria, tradhtia dhe dhuna u përzien në një skenar që vetëm jeta reale mund ta shkruajë.