Jason Derulo në qendër të kritikave sepse mban peshkaqen në shtëpi

Jason Derulo po përballet me një valë kritikash në rrjetet sociale pasi një video e publikuar së fundmi zbuloi një nga elementët më të veçantë të shtëpisë së tij luksoze në Kaliforni.

Në pamjet që u bënë virale, këngëtari shfaq një akuarium të integruar në dysheme, ku mbahen disa peshkaqenë dhe një manta ray. Megjithatë, ajo që për Derulon mund të jetë një detaj mbresëlënës i dekorit, për shumë ndjekës është kthyer në një arsye revolte.

Përdorues të shumtë në rrjetet sociale e akuzuan artistin se po i mban kafshët detare në kushte të papërshtatshme, duke pretenduar se hapësira është shumë e kufizuar për nevojat e tyre natyrore. Disa e cilësuan situatën si një formë shfrytëzimi të kafshëve për efekt vizual dhe luks personal.

Komentet kritike nuk munguan, me shumë persona që vunë në pikëpyetje mungesën e elementeve që do të krijonin një habitat më natyral për kafshët. Të tjerë theksuan se ekspozimi i vazhdueshëm ndaj dritave, zhurmave dhe pranisë së njerëzve mund të ndikojë negativisht në mirëqenien e tyre.

Debati ka ndezur diskutime të shumta online, ndërsa Derulo nuk ka reaguar ende publikisht ndaj akuzave. Megjithatë, videoja vazhdon të qarkullojë gjerësisht, duke e vendosur këngëtarin në qendër të një polemike që po tërheq vëmendjen e publikut dhe aktivistëve për mbrojtjen e kafshëve.